Fréttir

Fjöldi stöðugilda ríkis í víðu samhengi

Byggðastofnun hefur gert árlega könnun á staðsetningu starfa á vegum ríkisins frá áramótum 2013/2014. Fyrir liggja nú tölur um fjölda stöðugilda til áramótanna 2016/2017. Störfin eru mun fleiri en stöðugildin en við höfum kosið að setja upplýsingarnar fram í fjölda stöðugilda. Þá er miðað við hvar störfin eru unnin, en ekki hvar viðkomandi starfsmaður býr. Þá er tölum skipt niður á konur og karla.

Stöðugildum er skipt í tvo flokka, í fyrsta lagi stöðugildi sem greidd eru af Fjársýslunni sem og hjá opinberum hlutafélögum og stofnunum í eigu ríkisins. Þeim flokki tilheyra til að mynda ráðuneytin, Byggðastofnun, Háskóli Íslands og Isavia. Síðan eru það stofnanir sem hafa meirihluta rekstrartekna sinna af fjárlögum. Má nefna sem dæmi Háskólann í Reykjavík, SÁÁ og hjúkrunar- og dvalarheimilin. „Víð skilgreining“ ríkisstarfa eru þessir tveir flokkar samanlagðir.

Í eftirfarandi töflu má sjá fjölda stöðugilda hjá ríkinu í víðri skilgreiningu, um áramót fjögur ár í röð, skipt niður á kyn. Sjá má að stöðugildum hefur fjölgað á milli allra ára, þó hlutfallslega mest á milli áranna 2015 og 2016. Þá hefur kynjahlutfallið verið nokkuð svipað á milli ára en stöðugildi sem konur sinna telja um 63% ár hvert.

Í eftirfarandi töflu má sjá fjölda stöðugilda hjá ríkinu í víðri skilgreiningu, þann 31.12. 2016 skipt niður á landssvæði og kyn. Konur sinna 61 – 68% stöðugildanna á öllum landssvæðum utan Vestfjarða (58%), Suðurnesja (49%) og erlendis (49%).

Í eftirfarandi töflu má sjá í fyrsta lagi hlutfallsskiptingu íbúa niður á landssvæðin um áramótin 2015/2016. Þá má sjá hlutfallsskiptingu stöðugildanna skipt niður á landssvæðin. Að lokum má sjá hlutfallsskiptingu stöðugildanna með tilliti til íbúafjölda hvers landssvæðis.

Skiptingu stöðugilda niður á sveitarfélög og frekari tölulegar upplýsingar má finna neðst á þessari síðu.

Mikið er lagt upp með að hafa gögnin sambærileg á milli ára. Því fer gagnaöflun fram með skipulögðum hætti og drjúgum tíma er varið í að rýna gögnin. Þó ber þess að geta að enn gætu leynst villur í gögnunum og fögnum við öllum ábendingum til að betur megi fara. Yfir stendur nú vinna við að afla ganga fyrir áramótin 2017/2018 og verða þær birtar við fyrsta tækifæri.

Frekari upplýsingar veitir Anna Lea Gestsdóttir, sérfræðingur þróunarsviðs í síma 455-5433 eða í tölvupósti anna@byggdastofnun.is