Fréttir

Íbúafundur verður haldinn í bókasafni grunnskólans á Reykhólum miðvikudaginn 14. okt. nk. kl. 17:00-19:30 á vegum byggðaþróunarverkefnisins Fjársjóður fjalla og fjarða. Nýr verkefnisstjóri, Guðmundur Konráðsson, mun kynna sig til leiks en hann hefur tekið við keflinu af Emblu Dögg Bachmann og hóf störf síðsumars. Á fundinum verður m.a. farið yfir stöðu verkefnisins, styrkþegar munu segja frá frumkvæðisverkefnum sínum og íbúum mun gefast tækifæri til að ræða saman um verkefnisáætlun og koma með tillögur að breytingum eftir atvikum. Greint verður frá næsta umsóknarfresti í Frumkvæðissjóð Fjársjóðs fjalla og fjarða fyrir árið 2027. Veitingar verða í boði sveitarfélagsins. Íbúar Reykhólahrepps eru hvattir til virkrar þátttöku í verkefninu og vonast er eftir góðri mætingu á íbúafundinn.

Verkefnið er ein af aðgerðum Byggðaáætlunar, C.2, og markmið þess er að spornað verði við viðvarandi fólksfækkun í smærri byggðarlögum. Verkefnið byggir á samstarfi Byggðastofnunar, viðkomandi sveitarfélags, landshlutasamtaka og síðast en ekki síst íbúa hvers þátttökubyggðarlags. Því er einkum ætlað að styðja við frumkvæði og þátttöku íbúa til hagsbóta fyrir samfélagið í víðum skilningi.