Fréttir

Íbúafundur verður haldinn í Samkomuhúsinu Baldri þriðjudaginn 13. okt. nk. kl. 17:00-20:00 á vegum byggðaþróunarverkefnisins Jú víst! Kraftur í Kaldrana. Á fundinum mun nýr verkefnisstjóri, Ingibjörg Benediktsdóttir, kynna sig til leiks en hún hóf störf í byrjun september og tók við verkefnisstjórn af Valgeiri Jens Guðmundssyni. Á fundinum verður m.a. farið yfir stöðu verkefnisins, styrkþegar munu segja frá frumkvæðisverkefnum sínum og íbúum mun gefast tækifæri til að ræða saman um verkefnisáætlun og koma með tillögur um breytingar eftir atvikum. Greint verður frá næsta umsóknarfresti í Frumkvæðissjóð Jú víst! Kraftur í Kaldrana fyrir árið 2027. Þá munu fulltrúar fyrirtækjasviðs hjá Byggðastofnun greina í stuttu máli frá lánamöguleikum hjá Byggðastofnun. Veitingar verða í boði sveitarfélagsins. Vonast er eftir góðri mætingu á íbúafundinn og íbúar Kaldrananeshrepps á öllum aldri hvattir til virkrar þátttöku.

Verkefnið er ein af aðgerðum Byggðaáætlunar, C.2, og markmið þess er að spornað verði við viðvarandi fólksfækkun í smærri byggðarlögum. Verkefnið byggir á samstarfi Byggðastofnunar, viðkomandi sveitarfélags, landshlutasamtaka og síðast en ekki síst íbúa hvers þátttökubyggðarlags. Því er einkum ætlað að styðja við frumkvæði og þátttöku íbúa til hagsbóta fyrir samfélagið í víðum skilningi.