Fréttir

Í síðustu viku fór hin árlega nýsköpunarhátíð Iceland Innovation Week fram í Reykjavík. Á hátíðinni kemur saman fjölbreytt flóra fólks og fyrirtækja sem starfar innan nýsköpunar- og frumkvöðlasenunnar um allt land, auk hagaðila og annarra sem hafa brennandi áhuga á nýsköpun. Hátíðin er einnig vel sótt af erlendum fjárfestum, frumkvöðlum og fræðimönnum svo hér er um að ræða líflegan suðupott nýsköpunar, tækni og framþróunar.

Á viðburði sem þessum er mikilvægt að sú kraftmikla nýsköpun sem á sér stað utan höfuðborgarsvæðisins sé vel sýnileg. Í ár tóku landshlutasamtökin höndum saman, í samstarfi við Byggðastofnun, og stóðu fyrir sérstökum hliðarviðburði í Grósku þar sem öflugir frumkvöðlar frá öllum landshlutum létu ljós sitt skína með stuttum, hressandi og fjölbreyttum erindum.

Mörg þeirra sem áttu sviðið höfðu tekið þátt í nýsköpunarhraðlinum Startup Landið á síðasta ári, en hraðallinn er ætlaður frumkvöðlum um land allt og er leiddur áfram af landshlutasamtökunum. Startup Landið verður haldið í annað sinn í ár og hefur þegar opnað fyrir umsóknir. Einnig tóku til máls fulltrúar verkefna og fyrirtækja sem notið hafa stuðnings landshlutasamtaka í sínu héraði, ýmist í gegnum ráðgjöf eða styrkveitingar úr Uppbyggingarsjóði.

Markmið viðburðarins var fyrst og fremst að varpa ljósi á þá fjölbreyttu nýsköpun sem á sér stað víðsvegar um landið og þann síaukna kraft sem býr í nýsköpunarumhverfi landsbyggðarinnar, ekki síst fyrir tilstilli landshlutasamtakanna. Það er mikilvægt er að nýta vettvang sem þennan til að beina sjónum fólks einnig út fyrir höfuðborgarsvæðið, þar sem tækifærin til nýsköpunar, verðmætasköpunar og framþróunar eru sannarlega á hverju strái.

Nokkuð hefur skort á sýnileika landsbyggðarinnar á Iceland Innovation Week fram til þessa, en með samhentu átaki landshlutasamtakanna og Byggðastofnunar er ætlunin að breyta því. Landsbyggðin á fullt erindi inn í samtalið um framtíð nýsköpunar á Íslandi og á að fá þar sinn verðuga sess héðan af.

Á heimasíðu Austurbrúar má nálgast skemmtilegt viðtal við Margréti Pollý Hansen, einni af verkefnastjórum Startup landið og byggðaþróunarfulltrúa hjá Samtökum sunnlenskra sveitarfélaga (SASS), þar sem hún ræðir viðburðinn á Nýsköpunarvikunni, Startup landið og sýnileika nýsköpunar á landsbyggðinni.