Fréttir

Horft yfir Steingrímsfjörð til Drangsness - KÞH

Kaldrananeshreppur er næsta byggðarlag sem hefja mun þátttöku í byggðaþróunarverkefninu Brothættar byggðir. Stjórn Byggðastofnunar samþykkti á fundi sínum þann 27. mars sl. að bjóða Kaldrananeshreppi til samstarfs í verkefninu.

Undirbúningur verkefnisins í Kaldrananeshreppi er hafinn

Undirbúningur er hafinn að verkefninu sem felur m.a. í sér að gerður hefur verið þríhliða samningur um verkefnið á milli Byggðastofnunar, Kaldrananeshrepps og Vestfjarðastofu. Eitt af næstu skrefum er væntanlega að auglýst verður eftir verkefnisstjóra til að leiða verkefnið. Það er Vestfjarðastofa sem annast ráðningarferlið og verður starfsmaðurinn jafnframt starfsmaður hennar. Eitt af fyrstu skrefum verkefnisins að öðru leyti verður að skipa verkefnisstjórn sem mun taka ákvarðanir um framkvæmd verkefnisins þ.m.t. undirbúning íbúaþings. Íbúaþingið er talið marka upphaf þátttöku íbúa í verkefninu. Vonast er til að hægt verði að halda slíkt íbúaþing í haust og í kjölfarið muni verkefnisstjóri og verkefnisstjórn móta verkefnisáætlun.

Sextánda byggðarlagið í Brothættum byggðum

Byggðarlagið er það sextánda í röðinni sem hefur þátttöku í Brothættum byggðum frá því að verkefnið hóf fyrst göngu sína á Raufarhöfn árið 2012. Gert er ráð fyrir að verkefnistíminn muni að óbreyttu vara í fimm ár þ.e. til loka árs 2030, en í samningum verði ákvæði um mögulega aðlögun verkefnisins þannig að vel fari saman Brothættar byggðir í Kaldrananeshreppi og verkefnið Strandaauður, ef til þess síðarnefnda kemur.