Fréttir

Mannfjöldaspá Byggðastofnunar 2021-2070 á sveitarfélagagrunni hefur verið gefin út. Um er að ræða niðurbrot mannfjöldaspár Hagstofu Íslands á sveitarfélög og er þetta í þriðja sinn sem Byggðastofnun gefur út mannfjöldaspá með þessum hætti. 

Mannfjöldaspáin er gerð með mannfjöldalíkani Byggðastofnunar sem er slembilíkan og byggir á hlutlægum aðferðum og notast eingöngu við söguleg gögn, þ.e. engar forsendur eru fyrirfram gefnar og hvergi er notast við sérfræðiálit. Mannfjöldalíkan Byggðastofnunar byggir því á því „að fram haldi sem horfir“. Niðurstöður mannfjöldaspárinnar eru settar fram sem meðaltal og 80% spábil 10.000 slembiúrtaka líkansins og skalað við miðspá Hagstofu Íslands.

Opinber gögn frá Hagstofu Íslands um mannfjölda, búferlaflutninga, fæðingar og dauðsföll eru notuð sem inntaksgögn fyrir mannfjöldalíkanið.

Spásvæðin eru alls 129 og samanstanda af 69 sveitarfélögum og 60 öðrum spásvæðum sem skiptast  niður í sex mismunandi svæðaskipanir. Mannfjöldaspáin gefur fjölda fyrir hvern aldur frá 0-99 ára og safnflokk fyrir 100 ára og eldri.

Mannfjöldaspáin nær frá árinu 1. janúar 2021 til ársins 1. janúar 2070, eða 49 ár fram í tímann. Spáin gefur vísbendingar um að fólki haldi áfram að fjölga á höfuðborgarsvæðinu með stöðugri fækkun víða á landsbyggðunum. Hafa ber í huga að óvissa þessarar mannfjöldaspár er töluverð og þó að hún geti gefið þokkalega mynd af mannfjöldaþróun til skemmri tíma, t.d. 15 ára, verður að taka niðurstöðum til lengri tíma með fyrirvara.

Skýrslu um mannfjöldaspá Byggðastofnunar má nálgast hér að neðan í nokkrum hlutum. Innan skamms verður spáin gerð aðgengileg um vefviðmót á heimasíðu Byggðastofnunar. Einnig er hægt að óska eftir gögnum með því að senda beiðni á postur@byggdastofnun.is.

 Mannfjöldapá Byggðastofnunar:

• Mannfjöldaspá + viðaukar A og B - Skölun mannfjöldaspár Skölun búferlaflutninga
• Viðaukar C, D, E, F og G – Mannfjöldagröf fyrir allt landið, meginsvæði, landshluta, kjarnasvæði og hagsvæði
• Viðauki H – Mannfjöldagröf fyrir sveitarfélög
• Viðaukar I, J, K, L og M - Undirþættir mannfjöldans fyrir allt landið, meginsvæði, landshluta, kjarnasvæði og hagsvæði
• Viðauki N – Undirþættir mannfjöldans fyrir sveitarfélög