Fréttir

Skjáskot úr mælaborði

Mælaborð Byggðastofnunar um íbúafjölda sveitarfélaga og byggðakjarna hefur verið uppfært með mannfjöldatölum sem Hagstofa Íslands birti í október. Þann 1. janúar 2025 voru íbúar landsins 389.444 en þar af bjuggu 372.127 (96%) í byggðakjörnum og 17.317 (4%) í dreifbýli. Á höfuðborgarsvæðinu voru 249.054 íbúar (64% landsmanna) en 140.390 (36%) utan höfuðborgarsvæðis.

Hagstofan endurskoðar mörk byggðakjarna á fimm ára fresti og að þessu sinni hafa orðið til sjö nýir byggðakjarnar: Tveir þeirra eru í Svalbarðsstrandarhreppi (Veigastaðir og Sólberg), tveir í Ölfusi (Gljúfurárholt og Vellir), einn í Eyjafjarðarsveit (Öngulsstaðir), einn við Mývatn (Vogar) og einn í Öræfum (Hof). Þá skilgreinast Laugarbakki í Miðfirði og Hallormsstaður á Héraði aftur sem byggðakjarnar eftir nokkurt hlé, því íbúafjöldinn nær fimmtíu á nýjan leik.

Nú hefur gagnaskipulagi mælaborðs um íbúafjölda jafnframt verið breytt, þannig að þar byggir á smærri svæðiseiningum en áður. Þetta varð mögulegt með tilkomu nýrra gagna Hagstofu um mannfjölda eftir sveitarfélagaskipan ársins 1950 (229 svæði).

Í mælaborðinu eru byggðakjarnar og svæði sýnd á korti og upplýsingar um íbúafjölda, kynjaskiptingu og aldursdreifingu birtast þegar svæði eru valin á kortinu eða úr töflum. Vinstra megin í mælaborðinu er hægt að velja svæðaskiptingu og þar er hægt að stilla á Sveitarfélög 1950 til að sjá smæstu svæðaskiptingu landsins sem í boði er.

Hægt er að fara inn á mælaborðið á heimasíðu Byggðastofnunar.