Fréttir

Um síðustu áramót leystu nýir samningar Byggðastofnunar og átta atvinnuþróunarfélaga um starfsemi félaganna af hólmi eldri samninga um starfsemi félaganna.

Helstu breytingar í nýju samningunum varða styrki til sérstakra verkefna félaganna sem nú verða veittir úr einum sameiginlegum samkeppnissjóði, að markmið stefnumarkandi byggðaáætlunar Alþingis munu gilda fyrir félögin og að mat félaganna á starfi og starfsárangri verður eflt.

Ljóst er að mörg atvinnuþróunarfélög hafa verið að skila góðum verkum og áhrifum á starfssvæðum sínum en þennan árangur hefur þó reynst erfitt að mæla og meta á einsleitan hátt og þar af leiðandi hefur líka reynst erfitt að lýsa honum á einfaldan hátt og því lagði Byggðastofnun mikla áherslu á starfmatið við gerð nýju samninganna og aðild stofnunarinnar að því. Í nýju samningunum er lögð áhersla á nýsköpun sem raunar hefur verið snar þáttur í verkefnavinnu atvinnuþróunarfélaganna, í mörgum tilvikum í samstarfi við erlenda aðila, einkum á sviði ferðamála. Með einum samkeppnissjóði er þess vænst að félögin muni leggja enn meiri áherslu á starf við vandlega valin og vænleg nýsköpunarvekefni. Á heimasíðu Byggðastofnunar, undir innlent samstarf, má finna slóð á heimasíður atvinnuþróunarfélaganna.