Fréttir

Í tengslum við komandi umsóknarlotu stendur NORA, Norræna Atlantssamstarfið, fyrir tveimur rafrænum kynningum um verkefnastyrki þriðjudaginn 8. september 2026. Önnur kynningin fer fram á dönsku og hin á ensku. Kynningarnar eru ætlaðar áhugasömum og mögulegum umsækjendum um styrki.

NORA getur styrkt verkefni um allt að 500.000 danskar krónur á ári (þrisvar sinnum). Ef þú hefur góða verkefnahugmynd og mögulegan samstarfsaðila í öðru NORA landi þá gætu kynningarnar verið vettvangur til að heyra um fjármögnunarmöguleika fyrir samstarfsverkefni í Norður-Atlantshafi.

Gott tækifæri gefst til að spyrja spurninga um styrkina og umsóknarferlið.

Ekki er þörf á skráningu fyrirfram á kynningarnar, bara mæta. Öll velkomin.

Hér eru slóðir á kynningarfundina, ásamt tímasetningu:

Kynning á dönsku: þriðjudaginn 8. september kl. 10:00

Kynning á ensku: þriðjudaginn 8. september kl. 11:00

Næsti umsóknarfrestur í NORA er mánudaginn 5. október 2026. Á heimasíðu NORA, www.nora.fo eru ítarlegar upplýsingar um umsóknarferlið og kynningarfundina.

Nánari upplýsingar veitir tengiliður NORA, Hanna Dóra Björnsdóttir hjá Byggðastofnun, netfang: hannadora@byggdastofnun.is

Norræna Atlantssamstarfið (NORA) eru samtök fjögurra landa og fellur starfsemin undir byggðastefnu Norrænu Ráðherranefndarinnar. Starfssvæði NORA nær til Grænlands, Íslands, Færeyja og strandhéraða Noregs (níu norskra strandfylka frá Finnmörku í norðri til Rogalands í suðri svo og Svalbarða). Landfræðileg lega, sameiginleg einkenni, viðfangsefni, saga, stofnanir svo og menningarleg bönd tengja NORA-löndin.