Fréttir

Skjáskot úr mælaborði

Byggðastofnun hefur birt árlega greiningu sína á staðsetningu stöðugilda á vegum ríkisins. Í skýrslunni Hvar eru ríkisstörfin 31.12.2025? má sjá fjölda stöðugilda eftir landshlutum, sveitarfélögum og málaflokkum ráðuneyta. Nánari upplýsingar eru jafnframt aðgengilegar í mælaborði Byggðastofnunar.

Við áramót 2025/2026 voru stöðugildi á vegum ríkisins 29.139 og hafði fjölgað um 103, eða 0,4%, milli ára. Til samanburðar fjölgaði stöðugildum um rúmlega 500 árið 2024 og um tæplega 800 á ári 2022 og 2023.

Flest ríkisstöðugildi eru áfram á höfuðborgarsvæðinu. Þar eru um 70% stöðugildanna en 64% landsmanna. Á árinu 2025 fjölgaði stöðugildum á höfuðborgarsvæðinu þó aðeins um 15 og varð fjölgunin því að stærstum hluta utan höfuðborgarsvæðisins.

Mest fjölgaði stöðugildum á Suðurlandi, um 80 eða 4,4%. Stór hluti fjölgunarinnar varð í Sveitarfélaginu Árborg, þar sem heildarfjöldi stöðugilda jókst um 74. Þar munar mestu um fjölgun hjá Heilbrigðisstofnun Suðurlands. Næstmest fjölgaði á Norðurlandi eystra, um 68 stöðugildi, þar af 53 á Akureyri. Á móti fækkaði stöðugildum mest á Suðurnesjum. Sú fækkun skýrist fyrst og fremst af breyttu fyrirkomulagi á rekstri fríhafnarverslana á Keflavíkurflugvelli. Töluverð fækkun varð einnig í Hafnarfirði, meðal annars vegna flutnings starfsstöðvar Matvælastofnunar til Reykjavíkur.