Fréttir

Byggðastofnun og Skipulagsstofnun hafa síðasta árið unnið saman að gerð og fjármögnun verkefnis um samþætta áætlanagerð á Íslandi. Málþing um verkefnið fer fram á Grand Hotel Reykjavík og hefst kl. 8:30, þriðjudaginn 31. október.

Spatial Planning in Northern Peripheral Regions

26.10.2006

Byggðastofnun og Skipulagsstofnun hafa síðasta árið unnið saman að gerð og fjármögnun verkefnis um samþætta áætlanagerð á Íslandi. Þetta verkefni er hluti af fjölþjóðlegu verkefni sem styrkt er af NPP-sjóði Evrópusambandsins og nefnt "Spatial Planning in Northern Peripheral Regions," stytt í SpatialNorth. Aðild að fjölþjóðlega verkefninu eiga að auki stofnanir og félög í Skotlandi, Finnlandi og Svíþjóð. Það er nú unnið til hálfs og samkvæmt áætlun gengst verkefnisstjórnin fyrir málþingi í Reykjavík 31. október og 1. nóvember nk. með sama heiti og verkefnið. Þangað er boðið fyrirlesurum víða að og fyrirlestrar og umræður munu fara fram á ensku.  

Samþætt áætlanagerð (Spatial Planning & Development) er leidd af þeirri stefnumörkun sem Evrópusambandið mótaði með ESDP (European Spatial Development Perspective) á grundvelli sjónarmiða um alþjóðavæðingu, samkeppnishæfni svæða, fjölkjarna (polycentric) þróun og sjálfbæra þróun. Áhersla er á samþættingu áætlana fyrir stór svæði til þess að ná árangri á þessum sviðum og skapa alþjóðlegum samþykktum og samningum farveg inn í áætlanir. Áhrif þessarar stefnu á Íslandi má t.d. sjá í nýjum lögum um umhverfismat áætlana.

Meginmarkmið fjölþjóðaverkefnis SpatialNorth er að þróa góðar aðferðir við samþætta áætlanagerð á norðlægum svæðum og á málþinginu verða flutt erindi til lýsingar á verkefninu. Með málþinginu er líka seilst eftir efnivið í seinni hluta verkefnisins sem einmitt er unnið með mótun góðra aðferða við hinar sérstöku norrænu aðstæður sem eru ólíkar þeim sem ríkjandi eru í þungamiðju Evrópusambandsins.

Í hverju landi sem aðild á að SpatialNorth verður unnið sérstakt verkefni, aðallega á árinu 2006, og í framhaldinu verður samstarf milli landa, árið 2007, sem felst í því að bera saman og meta aðferðir og niðurstöður og þróa góðar aðferðir á sviði samþættra áætlana. Verkefninu mun ljúka í árslok 2007.

Í íslenska verkhlutanum er fengist við þróun á austanverðu landinu og kannaðar aðstæður til að samþætta áætlanir um: a) nýja vatnsorkustöð og tilheyrandi álbræðslu, b) nýjan þjóðgarð, c) fiskveiðar og fiskeldi, d) ferðamála- og samgönguáætlanir, e) skipulag sveitarfélaga f) byggðaáætlun og aðrar áætlanir. Verkefnið á hins vegar að geta haft mun víðtækara notagildi, nýtast við gerð landshlutaáætlana sem ná til landshlutakjarna, grannsvæða þeirra og jaðarsvæða og áætlanagerð á ýmsum sérsviðum sem mikilvægt er að samhæfa í tengslum við slíka áætlun.

Markmið með verkefninu er ekki að fullmóta samþætta áætlun fyrir Austur-Ísland, heldur að leiða saman þá sem fást við þróunaráætlanir og landnotkunaráætlanir og fá fram mat á forsendum á Íslandi til gerðar samþættra þróunaráætlana fyrir stór svæði, forsendum s.s. aðferðum og aðstæðum fyrir samstarf, upplýsingum um efnahag, samfélag og náttúrufar, aðgengi að slíkum upplýsingum og skorti á þeim og skilyrðum til þess að nota landupplýsingakerfi í áætlunargerð.

Viðfangsefni málþingsins er því áhugavert fyrir alla þá sem fjalla um áætlanir og vinna að landrænni og samfélagstengdri áætlanagerð. Það fer fram á Grand Hotel Reykjavik og hefst kl. 8:30, þriðjudaginn 31. október. Nánari upplýsingar má finna á heimasíðunni http://www.spatialnorth.eu/ þar sem líka er að finna skráningarblað fyrir málþingið.

Dagskrá málþingsins má skoða hér