Fréttir

Frá íbúafundi í Strandabyggð

Þann 22. júní sl. kom verkefnisstjórn Sterkra Stranda saman á Hólmavík til fundar um verkefnið Sterkar Strandir. Blíðskaparveður beið fundargesta sem hófu fundinn á að sækja nokkra styrkhafa heim og fá kynningu á styrktum verkefnum. Fyrst var skíðasvæðið í Selárdal skoðað og aðstaðan þar. Þvínæst var stoppað í Sauðfjársetrinu á Ströndum og á Galdrasetrinu á Hólmavík. Einnig fékk verkefnisstjórn kynningu á byggingaráfomum vegna nýs atvinnuhúsnæðis og kynningu á verkefninu Kyrrðarkrafti.

Íbúafundur var haldinn síðla dags í félagsheimilinu á Hólmavík og var ágætlega sóttur. Á fundinum kynnti Siguður Líndal verkefnisstjóri stöðu verkefnisins og fór yfir markmið fundarins. Að því loknu var íbúum skipt upp í þrjá hópa eftir áhugasviði hvers og eins og fékk hver hópur það hlutverk að ígrunda eitt meginmarkmið Sterkra Stranda og þau starfsmarkmið sem íbúar hafa áður sett fram undir hverju meginmarkmiði. Í hverjum hópi sköpuðust góðar umræður þar sem staða markmiða var metin og lagðar voru fram tillögur að breytingum og/eða viðbótum við aðgerðaáætlun. Eftir hópavinnu gæddu fundargestir sér á dýrindis súpu og brauði áður en fulltrúar íbúa úr hverjum hópi kynntu helstu niðurstöður úr umræðum. Í lok fundarins gafst fundargestum tækifæri til almennrar umræðu og fyrirspurna um verkefnið.

Það má með sanni segja að mikil gróska er í verkefnum sem íbúar í Strandabyggð eru að vinna að um þessar mundir og hugur í íbúum að efla samfélag sitt. Nýlega var styrkjum úthlutað úr Frumkvæðissjóði Sterkra Stranda til fjölbreyttra verkefna og gaman verður að fylgjast með framvindu þeirra. Með samhentu átaki íbúa og samstarfsaðila í verkefninu Sterkum Ströndum standa vonir til að byggðalagið haldi áfram að styrkjast og eflast.

Myndirnar tók Laufey Skúladóttir