Fréttir

Nýr verkefnisstjóri, Bergdís Þrastardóttir, hóf störf hjá Vestfjarðastofu í byrjun ágúst. Bergdís mun leiða byggðaþróunarverkefnið Brothættar byggðir á Tálknafirði en samningar um verkefnið voru undirritaðir á milli Byggðastofnunar, Vesturbyggðar og Vestfjarðastofu fyrr á árinu. Búið er að skipa verkefnisstjórn í verkefninu og var fyrsti fundur verkefnisstjórnar jafnframt haldinn í gær í fjarfundi. Í verkefnisstjórn er samankomin mikil reynsla af samfélagsverkefnum og góð tenging við samfélagið í Vesturbyggð og á Tálknafirði.

Fyrstu skrefin

Fyrstu verkefni nýs verkefnisstjóra og verkefnisstjórnar verður undirbúningur íbúaþings sem vonir standa til að hægt verði að halda snemma hausts.

Starfsfólk Byggðastofnunar óskar nýjum verkefnisstjóra og verkefnisstjórn velfarnaðar í störfum sínum og hlakkar til komandi samstarfs. Það eru sannarlega spennandi tímar framundan á Tálknafirði og þess er vænst að verkefnið Brothættar byggðir muni leggja lóð á vogarskálar í að efla byggð, atvinnulíf og búsetugæði á Tálknafirði á næstu árum, en gert er ráð fyrir að verkefnið standi yfir til loka maí 2031, hvað aðkomu Byggðastofnunar varðar.

Fylgist með framvindunni

Vakin er athygli á því að hægt verður að fylgjast með framgangi mála í verkefninu á fésbókarsíðu verkefnisins, sem senn mun líta dagsins ljós. Einnig má nálgast upplýsingar um byggðaþróunarverkefnið Brothættar byggðir á heimasíðu Byggðastofnunar hér.

Hægt er að hafa samband við verkefnisstjóra, Bryndísi Þrastardóttur, á netfangið bergdis@vestfirdir.is

Verkefnisstjórn Brothættra byggða á Tálknafirði skipa:

• Bergdís Þrastardóttir, verkefnisstjóri
• Nancy Rut Helgadóttir, fulltrúi íbúa
• Gunnlaugur Björn Jónsson, fulltrúi íbúa
• Jenný Lára Magnadóttir, fulltrúi sveitarfélags
• Aðalsteinn Óskarsson, fulltrúi Vestfjarðastofu
• Auk tveggja fulltrúa frá Byggðastofnun

Frá fyrsta fundi verkefnisstjórnar 13. ágúst 2026.

Verkefnið er ein af aðgerðum Byggðaáætlunar, C.2, og markmið þess er að spornað verði við viðvarandi fólksfækkun í smærri byggðarlögum. Verkefnið byggir á samstarfi Byggðastofnunar, viðkomandi sveitarfélags, landshlutasamtaka og síðast en ekki síst íbúa hvers þátttökubyggðarlags. Því er einkum ætlað að styðja við frumkvæði og þátttöku íbúa til hagsbóta fyrir samfélagið í víðum skilningi.