Fréttir

Svæði daglegrar vinnusóknar eru mikilvæg svæði fyrir byggðaþróun. Innan þeirra sækir fólk daglega milli heimilis og vinnustaðar þannig að þau geta verið eðlilegri viðmiðunarsvæði en sveitarfélög eða landshlutar. Á vinnusóknarsvæði sjávarþorps getur aflabrestur verið stóráfall en störfin þar verið svo lítill hluti af störfum í landshluta að á þeim grunni mælist breytingin lítil.

Torsótt var og er enn að tengja saman rafrænar upplýsingar um staðsetningu heimilis og vinnustaðar heimilisfólks og til þess að fá þessum vinnusóknarsvæðum lýst fékk Byggðastofnun síðla árs 2008 atvinnuþróunarfélögin átta til liðs við að greina vinnusóknarsvæði þéttbýlisstaða. Mótað var einfalt verklag við greininguna og byggt á staðarþekkingu og upplýsingaöflun starfsmanna atvinnuþróunarfélaganna og vinnusóknarsvæði þéttbýlisstaðanna sýnd á yfirlitskorti sem hefur verið til endurskoðunar á haustdögum 2011 í kjölfar breytinga á samgöngukerfinu síðustu misserin. Uppfært kort sem sýnir svæði daglegrar vinnusóknar 2011 sýnir nokkrar breytingar frá 2008, vinnusóknarsvæði Siglufjarðar nær nú inn til Ólafsfjarðar og skarast þar við vinnusóknarsvæði þéttbýlisstaðanna við Eyjafjörð, vinnusóknarsvæði Reyðarfjarðar nær nú til Seyðisfjarðar og dagleg vinnusókn er milli Reykhóla og Hólmavíkur og af svæði Reykhóla til Búðardals.

Nánar má sjá kort af vinnusóknarsvæðunum 2011 hér, lýsingu á þeim hér og kort af vinnusóknarsvæðunum frá 2008 hér.