Fréttir

Þegar verkefnið „Bíldudalur – samtal um framtíðina“, hófst haustið 2013, ríkti óvissa um stöðu byggðar á Bíldudal en vonir stóðu til uppbyggingar í fiskeldi. Sú hefur nú orðið raunin og íbúum fjölgar jafnt og þétt. Því líður nú að lokum verkefnisins, sem er eitt af sjö verkefnum á vegum Byggðastofnunar undir heitinu „Brothættar byggðir“. Miðvikudaginn 18. maí, var haldinn íbúafundur á Bíldudal þar sem staða verkefnisins var metin og rætt um styrkveitingar og hvernig hægt sé að tryggja að verkefnið skili árangri til lengri tíma.

Byggðastofnun veitir lán í erlendri mynt, í bandaríkjadal (USD), evrum (EUR) og japönskum jenum (JPY). Lán í erlendri mynt eru að jafnaði veitt til 10-12 ára ,hámarks lánstími er 15 ár. Vextir á erlendum lánum eru breytilegir og miðast við millibankavexti að viðbættu álagi. Ávallt er krafist veðtrygginga fyrir lánunum, veð geta verið fasteignir, skip eða lausafé. Hámarks veðsetningarhlutfall er 70% af verðmæti fasteigna og 50% af verðmæti skipa og/eða annars lausafjár. Byggðastofnun veitir einungis lán í erlendri mynt til fyrirtækja sem hafa tekjur í erlendri mynt.

Íbúar Grímseyjar eiga sér þá framtíðarsýn að byggð í eynni blómstri, með útgerð og ferðaþjónustu og vel hirtu umhverfi. Börnin í grunnskólanum telja einstakt að alast upp í Grímsey og eru ánægð með nálægð við náttúruna og samfélag sem er eins og ein fjölskylda.

Kallað er eftir erindum frá fræða- og háskólasamfélaginu, stefnumótendum og þeim sem vinna á vettvangi um stöðu og þróun byggðar. Byggðaráðstefnan 2016 verður haldin á Breiðdalsvík 14.-15. september 2016.

Ársfundur Byggðastofnunar var haldinn föstudaginn 15. apríl sl. í Miðgarði í Skagafirði. Á fundinum kynnti Herdís Á Sæmundardóttir stjórnarformaður m.a. byggingu nýrrar skrifstofu fyrir stofnunina. Sjávarútvegs- og landbúnaðarráðherra Gunnar Bragi Sveinsson flutti ræðu, Landstólpinn var afhentur auk þess sem kynnt voru verkefni á byggðaáætlun og styrkir veittir út Byggðarannsóknasjóði.

Á ársfundi Byggðastofnunar sem haldinn var í Miðgarði í Varmahlíð föstudaginn þann 15. apríl, var Landstólpinn, samfélagsviðurkenning Byggðastofnunar, afhentur í sjötta sinn. Að þessu sinni hlutu söngbræðurnir fjórir frá Álftagerði í Skagafirði ásamt Stefáni Gíslasyni listrænum stjórnanda þeirra viðurkenninguna.

Stjórn Byggðastofnunar ákvað á fundi sínum þann 15. apríl sl. að styrkja fjóra meistaranema sem vinna að lokaverk­efnum á sviði byggðamála. Heildarupphæð styrkjanna er 1 milljón. Tvö verkefni fá styrk að upphæð 350.000 hvort og önnur tvö styrki að upphæð 150.000 hvort. Verkefnin eru fjölbreytt að snúa að ferðamálum, skipulagsmálum, raforkuframleiðslu og flutningi ríkisstofnana.

Úthlutun úr Byggðarannsóknasjóði var kynnt á ársfundi Byggðastofnunar í dag, 15. apríl. Svæðisbundin áhrif íslenskra háskóla, hagnýtt gildi framtíðarfræða við byggðaþróun, fjarbúar og fasteignamarkaður á landsbyggðunum og vinnusóknarmynstur og vinnusóknarsvæði á Norðurlandi eru þau verkefni sem stjórn Byggðarannsóknasjóðs ákvað að styrkja árið 2016.

Ársfundur Byggðastofnunar verður haldinn föstudaginn 15. apríl 2016 í Miðgarði í Skagafirði.

Til þess að efla byggð í Hrísey þarf að nýta betur mikla sérstöðu eyjarinnar, bæði til markaðssetningar og nýsköpunar, en líka til þess að laða að nýja íbúa. Mikilvægt er að stuðla að fjölbreytni í atvinnulífi í eynni auk þess að standa vörð um innviðina og alla grunnþjónustu.