Fréttir

Þá er runninn upp síðasti vinnudagur Péturs Bjarnasonar hjá Byggðastofnun. Pétur hefur starfað hjá stofnuninni frá áramótunum 2013/2014 og sinnt málefnum AVS sjóðsins sem nú færist undir Atvinnuvega- og nýsköpunarráðuneytið og sameinast þar Framleiðnisjóði landbúnaðarins í hinum nýja Matvælasjóði.

NPA COVID-19 umsóknarkall var opnað 20. maí. Hámarkstyrkur er 45.000 evrur. Verkefnistími 2-4 mánuðir. Starfsfólk NPA (JS) í Kaupmannahöfn verða með fjarupplýsingafund 27. maí kl.13:00 CET. Nánari upplýsingar um fjarfundinn og umsóknarkallið eru á heimasíðu NPA interreg-npa.eu.

North Atlantic Corona Challenge (NACC) verður haldið 29.-31. maí og er fjölþjóðlegt hakkaþon á vegum NORA fyrir ungmenni á Íslandi, Færeyjum, Grænlandi, Noregi og Skotlandi.

Stjórn Byggðarannsóknasjóðs hefur ákveðið að styrkja fjögur verkefni á árinu 2020. Verkefnin sem styrk hljóta eru rannsóknir sem lúta að áhrifum fjórðu iðnbyltingarinnar, fasteignamarkaði, kortlagningu örorku og verslun í dreifbýli.

Miðvikudaginn 29. apríl var haldinn rafrænn fundur fyrir íbúa Strandabyggðar í verkefninu Brothættar byggðir. Tilefni fundarins var að kynna styrkjamöguleika í fjárfestingarátaki í Brothættum byggðum.

Ráðstefnan verður haldin á Hótel Kötlu á Höfðabrekku í Mýrdal 13.-14. október. Ráðstefnan er vettvangur fólks úr háskólum, stjórnsýslu, sveitastjórnum, skólakerfinu og annarra sem áhuga hafa á byggðaþróun og menntamálum.

Sem hluti af aðgerðum vegna veirufaraldurs hefur Alþingi samþykkt að veita aukalega 100 m.kr. til Brotthættra byggða á árinu 2020.

Ársfundur Byggðastofnunar var haldinn fimmtudaginn 16. apríl. Aðstæður í samfélaginu settu mark sitt á efni og framkvæmd fundarins og fór hann fram í formi fjarfundar að þessu sinni. Samgöngu- og sveitarstjórnarráðherra kynnti skipan sjö manna stjórnar Byggðastofnunar á ársfundinum og var Magnús B. Jónsson frá Skagaströnd aftur skipaður formaður stjórnarinnar. Í tengslum við ársfundinn kom út ársskýrsla Byggðastofnunar en þar má lesa nánar um einstök verkefni og rekstur stofnunarinnar á síðasta starfsári.

Líkt og undanfarin ár, hefur Byggðastofnun fengið Orkustofnun til að reikna út kostnað á ársgrundvelli við raforkunotkun og húshitun, á sömu fasteigninni á nokkrum þéttbýlisstöðum og nokkrum stöðum í dreifbýli. Við útreikninga þessa er almenn rafmagns notkun og fastagjald tekin saman annarsvegar og hitunarkostnaður hinsvegar. Gjöldin eru reiknuð út samkvæmt gjaldskrá þann 1. september 2019 en til samanburðar eru gjöld frá sama tíma árin 2016 til 2018 en miðað er við sömu staði og fyrri ár en Mosfellsbæ og Hafnarfirði var bætt inn árið 2018.

Í febrúar sl. auglýsti Byggðastofnun eftir sérfræðingum til starfa á þróunarsviði stofnunarinnar. Alls bárust 36 umsóknir, 17 frá konum og 19 frá körlum. Nú hefur verið ákveðið að ráða í störfin Reinhard Reynisson, Ölfu Dröfn Jóhannsdóttur og Þorkel Stefánsson og er reiknað með að þau hefji störf í maí mánuði.