Fréttir

Hinn 1. júlí 1998 var undirritaður samningur milli Landssímans og Byggðastofnunar um myndsímatengibrú, síðar nefnd Byggðabrú. Með samningum er Byggðastofnun tryggður óheftur afnotaréttur að Byggðabrúnni á bestu kjörum sem gilda í símtölum innanlands á hverjum tíma, og getur Byggðastofnun ráðstafað þeim rétti til atvinnuþróunarfélaga eða þeirra aðila sem gerast aðilar að sérstöku þróunarverkefni sem Byggðastofnun, Landssíminn og atvinnuþróunarfélög standa að.

Þróunarsvið Byggðastofnunar stóð í vetur fyrir verkefnavinnu um búsetuþætti á landsbyggðinni í samvinnu við atvinnuþróunarfélögin á landsbyggðinni. Fulltrúar frá ýmsum sveitarfélögum tóku einnig þátt í verkefninu, ásamt fulltrúum frá Háskólanum á Akureyri, Háskóla Íslands og Sambandi íslenskra sveitarfélaga.

Á fundi stjórnar Byggðastofnunar þann 21. janúar sl. var ákveðið að stofnunin mun ekki veita almenna styrki eða kaupa hlutafé á árinu 2005. Verði breyting á þessari ákvörðun verður það auglýst sérstaklega.

Byggðastofnun hefur efnt til samkeppni um verkefnið "Rafrænt samfélag". Verkefnið er liður í framkvæmd þingsályktunar um stefnu í byggðamálum 2002-2005, sem samþykkt var á Alþingi síðastliðið vor. Byggðastofnun annast framkvæmd verkefnisins og hefur undirbúningur staðið frá miðju síðasta ári.