Fréttir

Íbúaþing verður haldið í samkomuhúsinu Baldri á Drangsnesi dagana 4. og 5. október nk. Undanfarið hefur verkefnisstjórn nýs þátttökubyggðarlags í Brothættum byggðum í Kaldrananeshreppi undirbúið íbúaþingið sem standa mun yfir frá kl. 11:00-16:00 á laugardeginum og frá kl. 11:00-15:00 á sunnudeginum.

Tuttugu og fimm ára afmælisráðstefna Norðurslóðaáætlunarinnar sem fram fer í Bodø í Noregi verður í beinu streymi 1. og 2. október. Á ráðstefnunni sem ber heitið Punktarnir tengdir koma saman þátttakendur í verkefnum og fulltrúar samfélaga á starfssvæði áætlunarinnar ásamt umsjónaraðilum hennar.

Dagana 15.-18. september heimsóttu Arnar Már forstjóri og Sigríður Elín forstöðumaður þróunarsviðs fulltrúa sveitarfélaga í Grímsnes- og Grafningshreppi, í Hrunamannahreppi, í Skeiða- og Gnúpverjahreppi, í Bláskógabyggð, í Ölfusi, í Mýrdalshreppi og í Skaftárhreppi.

Innviðaráðherra auglýsir eftir umsóknum um framlög sem veitt eru á grundvelli stefnumótandi byggðaáætlunar fyrir árin 2022-2036 vegna verkefna sem tengjast aðgerð A.9 Verslun í dreifbýli.

Undanfarin misseri hefur stjórn Byggðastofnunar haft það fyrir reglu að halda stjórnarfund a.m.k. einu sinni á ári í byggðarlögum þar sem byggðaþróunarverkefnið Brotthættar byggðir hefur verið í gangi.

Þann 20. sept. sl. var Baskasetrið í Djúpavík opnað formlega við hátíðlega athöfn. Baskasetrið er samstarfsverkefni Baskavinafélagsins þar sem Ólafur J. Engilbertsson er í forsvari, Háskólaseturs Vestfjarða, Albaola á Spáni, Haizebegi í Frakklandi og Hótels Djúpavíkur. Frá árinu 2022 hefur verkefnið tekið þátt í evrópsku samstarfi styrktu af sjóðnum Creative Europe á vegum Evrópusambandsins en segja má að formleg opnun Baskasetursins séu afurð þess samstarfsverkefnis.

Samþykktar hafa verið lánveitingar til 35 aðila að fjárhæð 2,7 ma.kr. sem falla undir bakábyrgðakerfi InvestEU eða 84,4% af heildarfjármagninu. Stofnunin er í viðræðum við Evrópska Fjárfestingasjóðinn um stækkun pottsins.

Stöðugildi á vegum ríkisins voru 29.054 þann 31. desember 2024, þar af voru 18.802 skipuð af konum og 10.252 af körlum. Á árinu 2024 fjölgaði stöðugildum um 538 á landsvísu eða 1,9%.

Byggðastofnun auglýsir styrki til meistaranema sem vinna að lokaverkefnum á sviði byggðaþróunar. Kostur er ef verkefnin hafa skírskotun til byggðaáætlunar. Til úthlutunar er allt að 1.200.000 kr. og stefnt er að því að veita allt að fjóra styrki.

Nú er mögulegt að sækja um styrki til samstarfsverkefna á Norður-Atlantssvæðinu á vegum NORA (Norræna Atlantssamstarfsins). Eitt af meginhlutverkum NORA er að styrkja og stuðla að framgangi verkefna og efla tengsl á NORA svæðinu með það að markmiði að gera svæðið að betri heimkynnum.