Fréttir

Verkefninu „Veljum Vopnafjörð“, sem hófst með íbúaþingi í apríl 2016 er nú formlega lokið. Verkefnið var leitt af Vopnafjarðarhreppi, með stuðningi frá Byggðastofnun, Austurbrú og Nýsköpunarmiðstöð Íslands. ILDI rjáðgjöf sá um framkvæmd og skipulag verkefnisins. Kjarni verkefnisins var áhersla á samtal og samstarf við íbúa, höfða til frumkvæðis íbúanna, frumkvöðla og ungs fólks. Í því skyni var m.a. haldið málþing sl. vorið 2017 undir yfirskriftinni, Yngri, kraftmeiri og fjölbreyttari Vopnafjörður, sem byggir á skilaboðum íbúaþings.

Sjö milljónum króna úr verkefninu Breiðdælingar móta framtíðina var þann 7. maí úthlutað til 14 samfélagseflandi verkefna í Breiðdalshreppi. Þetta er fimmta úthlutunin en alls bárust 17 umsóknir.

Í fyrstu mánuðum ársins 2018 voru haldnir íbúafundir í Öxarfjarðarhéraði, Skaftárhreppi, Hrísey og Grímsey, sem liður í samtali við íbúa vegna verkefnisins Brothættar byggðir. Góð mæting var á alla fundina og sköpuðust líflegar og málefnalegar umræður.

Verkefnið INTERFACE er Erasmus+ samstarfsverkefni sem Byggðastofnun leiðir en samstarfsaðilar eru Háskólinn á Bifröst og stofnanir í Búlgaríu, Grikklandi, Írlandi og Ítalíu. Skammstöfunin INTERFACE vísar til verkefnisheitisins á ensku, „Innovation and Entrepreneurship for Fragile Communities in Europe“, sem þýða mætti sem „Nýsköpun og frumkvæði í brothættum byggðarlögum í Evrópu“.

Ef samgöngur eru góðar, atvinnulífið öflugt og íbúar kraftmiklir, er samfélaginu á Þingeyri og við Dýrafjörð allir vegir færir. Þetta eru niðurstöður tveggja daga íbúaþings sem haldið var í Félagsheimilinu á Þingeyri helgina 10. – 11. mars síðastliðinn. Um sextíu manns tóku þátt í þinginu, sem hófst með því að sýnt var skemmtilegt myndband um Þingeyri, unnið af nemendum á miðstigi grunnskólans og nemendur tónlistarskólans komu fram, við góðar undirtektir.

Helgina 10. – 11. mars er íbúum á Þingeyri og öðrum sem hafa tengsl við staðinn, boðið til íbúaþings í Félagsheimilinu. Með þinginu hefst verkefni þar sem Byggðastofnun, Ísafjarðarbær, Fjórðungssamband Vestfirðinga, Vestfjarðastofa og síðast en ekki síst íbúar, taka höndum saman til að efla byggð á Þingeyri.

Íbúaþing var haldið á Borgarfirði eystri 10. - 11. febrúar 2018. Þar kom fram að byggðarlagið hefur fjölmarga möguleika til að þar megi efla byggð til framtíðar, byggða á fjölbreyttri atvinnustarfsemi í hefðbundnum atvinnugreinum og nýsköpun út frá styrkleikum byggðarlagsins, meðal annars náttúru, sögu og mannauði.

Helgina 10. – 11. febrúar er íbúum, fjarbúum og öðrum hagsmunaaðilum á Borgarfirði eystri boðið til íbúaþings. Þingið markar upphaf að samtali við íbúa í verkefni Byggðastofnunar í svokölluðum brothættum byggðum, en umsókn Borgarfjarðarhrepps um þátttöku í verkefninu var samþykkt í ágúst síðastliðnum.

Verkefnið Raufarhöfn og framtíðin var fyrsta verkefnið í Brothættum byggðum og varð fyrirmynd verkefnisins á landsvísu. Það hófst á Raufarhöfn árið 2012 og íbúaþing var haldið í janúar 2013. Þar sem nú er komið á sjötta ár frá upphafi verkefnisins er tímabært fyrir Byggðastofnun að stíga út úr verkefninu, samkvæmt verklagi stofnunarinnar fyrir verkefnið Brothættar byggðir.

Þriðjudaginn 28. nóvember var haldinn íbúafundur í Árneshreppi á Ströndum sem liður í samtali við íbúa vegna verkefnisins Brothættar byggðir, en sveitarfélagið hefur nýverið verið tekið inn í verkefnið. Mjög góð mæting var á fundinn og sköpuðust líflegar og málefnalegar umræður.