Fréttir

Nýverið samþykkti stjórn Byggðastofnunar á fundi sínum að taka þrjú byggðarlög inn í verkefnið um framtíð brothættra byggða. Þau byggðarlög eru annars vegar Kópasker og nágrenni, sem tilheyrir Norðurþingi, hins vegar eyjarnar Grímsey og Hrísey sem tilheyra Akureyrarkaupstað.

Silja Jóhannesdóttir hefur verið ráðin verkefnastjóri byggðeflingarverkefnisins „Raufarhöfn og framtíðin“. Verkefnið er eitt af átaksverkefnum Byggðastofnunar á landsvísu í samstarfi við atvinnuþróunarfélög og sveitarfélög undir heitinu „Brothættar byggðir“.

Í gær var undirritaður samstarfssamningur Byggðastofnunar, SASS og Skaftárhrepps um verkefnið „Skaftárhreppur til framtíðar“, á fundi verkefnisstjórnar á Kirkjubæjarklaustri.

Eirný Vals hefur verið ráðin „ Verkefnisstjóri Brothættra byggða – Skaftárhreppur til framtíðar“, hjá Samtökum sunnlenskra sveitarfélaga. Eirný mun hafa búsetu í Skaftárhrepp og hefja störf um næstu mánaðarmót.

Nú í byrjun september voru haldnir fundir með nýjum sveitarstjórnum og verkefnisstjórnum í Breiðdalshreppi og Skaftárhreppi í verkefninu Brothættar byggðir. Þar var verkefnið kynnt fyrir nýju fólki í stjórnunum og rætt um framhaldið. Sigríður K. Þorgrímsdóttir og Kristján Þ. Halldórsson sátu fundina af hálfu Byggðastofnunar, en Kristján var verkefnisstjóri á Raufarhöfn og mun nú starfa fyrir verkefnið í heild sinni.

Í maí sl. var auglýst eftir umsóknum um þátttöku í verkefninu um framtíð brothættra byggða. Í auglýsingu kom fram að meginmarkmið verkefnisins á hverjum stað skyldu „ skilgreind af verkefnisstjórn á grundvelli umræðna og forgangsröðunar á íbúaþingum sem ætlað er að virkja frumkvæði íbúa og samtakamátt.“ Einnig kom fram að umsókn þyrfti að vera sameiginleg frá sveitarfélagi, landshlutasamtökum sveitarfélaga/atvinnuþróunarfélagi og íbúasamtökum, þar sem þau væru til staðar.

Frá því að umræða um þróunarverkefni Byggðastofnunar, Norðurþings, Atvinnuþróunarfélags Þingeyinga, Háskólans á Akureyri og íbúa Raufarhafnar hófst, á vormánuðum 2012, hefur ýmislegt verið til umfjöllunar og árangur náðst í nokkrum málum en minni í öðrum.

Fyrsti stjórnarfundur Rannsóknastöðvarinnar Rifs ses var haldinn á Raufarhöfn miðvikudaginn 11. júní sl. Í upphafi fundar afhentu Kristján Þórhallur Halldórsson, starfsmaður Byggðastofnunar á Raufarhöfn og Þorkell Lindberg stjórninni staðfesta skipulagsskrá stöðvarinnar og báru henni um leið góðar kveðjur frá Aðalsteini Þorsteinssyni, forstjóra Byggðastofnunar og Bergi Elíasi Ágústssyni bæjarstjóra Norðurþings, en Byggðastofnun, Náttúrustofan og Norðurþing eru stofnaðilar stöðvarinnar.

Í dag, föstudaginn 23. maí 2014, var haldinn stofnfundur Rannsóknastöðvarinnar Rifs, sem er sjálfseignarstofnun sem staðsett verður á Raufarhöfn. Stofnaðilar eru Byggðastofnun, Norðurþing og Náttúrustofa Norðausturlands. Í tengslum við átaksverkefni Byggðastofnunar á Raufarhöfn, Brothættar byggðir, hefur síðasta árið verið unnið að stofnun rannsóknastöðvar á Raufarhöfn, með það að markmiði að nýta sérstöðu Melrakkasléttu til rannsókna og styrkja um leið byggð og innviði samfélagsins.

Margt hefur áunnist á Raufarhöfn fyrir tilstuðlan verkefnisins, „Raufarhöfn og framtíðin“, en staða byggðarinnar er engu að síður alvarleg og brothætt. Þetta er meginniðurstaða fjölmenns íbúafundar sem haldinn var á Raufarhöfn, þriðjudaginn 8. apríl.